Guds leiðir!

Fríðhild Louisa Jensen, Strendur

Ofta eru vit menniskju so trek at fara tann vegin, ið Gud vil hava okkum at fara, ella gera tað, ið Gud vil hava okkum at gera. Vit vilja helst sleppa at ráða sjálvi og gera tað, ið VIT halda er best. Men Gud veit betri enn vit. Hann kendi okkum, áðrenn vit vórðu gitin í móðurlívi, og hann elskaði okkum so nógv, at hann gav sín egna son, so at hvør tann, sum trýr á hann, ikki skal glatast, men hava ævigt lív. Skuldi hann ikki vitað best? Hví eru vit tá so bangin fyri at lurta eftir Gudi og gera hansara vilja? Hví líta vit ikki bara á hann?

Latið okkum nýta tíð til bøn og bíbliulesnað, so vit kunnu vita, hvør hansara vilji er, og geva okkum tíð til at lurta eftir Gudi. Latið Gud leiða okkum allan vegin, so vit náa málið og koma heim til hansara ein dag.

Bøn:

Hjálp mær tá at líta trygt við vissu
bert á tíni lyfti, Harri kær,
so ei trúar djúpa frið eg missi,
sum títt orð bar mínum hjarta nær!